زمین

زمین سے متعلقہ اَعداد و شمار

اِستوائی قطر: 12,742 کلومیٹر سے 12,756 کلومیٹر (9,718 میل)

قطبی قطر: 12,714 کلومیٹر

کمیّت: 5,976 ملین ملین ملین ٹن (10²⁴x5.9736 کلوگرام)

رقبہ: 5,10,066 ملین مربع کلومیٹر (1,96,935 میل)

اِستوائی محیط: 40,075 کلومیٹر (24,859.7 میل)

قطبی محیط: 40,008 کلومیٹر (24,859.7 میل)

اَوسط درجۂ حرارت: 15^o سینٹی گریڈ (59^o فارن ہائیٹ)

اَوسط کثافت: 5.52گرام فی سینٹی میٹر

(یعنی پانی کی نسبت5.52 گنا سے زیادہ)

محورِی گردِش کا دَورانیہ: 24گھنٹے

محورِی جھکاؤ: 23.4415^o

سورج سے اَوسط فاصلہ: 14,95,98,000 کلومیٹر

(9,29,56,000 میل)

سال کی لمبائی: 365 دِن

زمین کی ساخت

زمین بنیادی طور پر چار تہوں پر مشتمل ہے:

1۔ قشرِ اَرض (The Crust)

یہ زمین کی سب سے بیرونی تہہ ہے جو چٹانوں سے بنی ہے۔ برِاعظم اور سمندر اسی پر قائم ہیں۔٭

٭ زمین کے اُوپر چڑھا خول جو ’سیلیکیٹ‘ پر مبنی ہے۔اس کی کم از کم موٹائی 6 کلومیٹر ہے، جبکہ زیادہ سے زیادہ 40 کلومیٹر تک چلی گئی ہے۔ مترجم

2۔ کرۂ حجری (The Mantle)

قشرِ ارض کے نیچے واقع وہ تہہ جو پگھلی ہوئی چٹانوں پر مشتمل ہے۔٭

٭ قشرِ اَرض کے نیچے واقع کسی حد تک جمے ہوئے ’سیلیکیٹ‘ کی تہہ، جو تقریباً 2,800 کلومیٹر موٹی ہے۔ مترجم

3۔ بیرونی مرکزہ (Outer Core)

پگھلے اور جمے ہوئے فولاد اور نِکل پر مشتمل تہہ۔٭

٭ اِس کی موٹائی تقریباً 2,300 کلومیٹر ہے۔ مترجم

4۔ اندرونی مرکزہ (Inner Core)

یہ (زمین کے بالکل درمیان میں واقع) جمے ہوئے فولاد (اور نِکل پر مُشتمل) ہے، جو نمایاں فرق کی بناء پر بخوبی پہچانا جاتا ہے۔٭

٭ اندرونی مرکزہ تقریباً 2400 کلومیٹر قطر پر محیط ہے۔ مترجم

تشکیلِ ارض کی داستان

زمین آج سے 4 ارب 60 کروڑ سال پہلے گرد و غبار کے ذرّات، گھومتی ہوئی گیسوں اور زیرِ تشکیل چھوٹے چھوٹے سیاروں کے مواد سے معرضِ وُجود میں آئی۔ کششِ ثقل نے اُن عناصر کو اِنتہائی دباؤ کے تحت باہم ملا دیا، جس سے گھومتے ہوئے مادّے کے اندر شدید حرارت اور دباؤ نے جنم لیا۔ اِس کے ساتھ ساتھ کششِ ثقل نے بھاری عناصر کو مرکز کی سمت کھینچ لیا اور گیسوں سمیت ہلکے عناصر اور مُرکّبات سطح کی طرف اِکٹھے ہونے لگے۔ نوزائیدہ زمین کو زہریلی گیسوں نے ہر طرف سے گھیر لیا جو بالآخر عام ہوا میں تبدیل ہوتی چلی گئیں۔ بیرونی تہہ سخت ہو گئی اگرچہ مرکز پھر بھی مائع حالت میں رہا۔٭

٭ نظامِ شمسی کی اِبتدائی تخلیق کے وقت سورج کے گِردگردِش کرنے والے 9بڑے اور ہزاروں چھوٹے گیسی مرغولے اوّلین عناصر کے دباؤ کے تحت مائع (یعنی لاوا) کی شکل اِختیار کرتے چلے گئے، جن سے بعد میں 9 سیارے اور بے شمار سیارچے وُجود میں آئے۔ اُنہی میں سے ایک ہماری زمین بھی ہے۔ مائع اور گیسی حالت پر مُشتمل اِبتدائی زمین کے بھاری عناصر مرکز کی طرف سمٹ آنے سے ہلکے گیسی عناصر لاوے کے اُوپر غلاف کی صورت میں چڑھ گئے اور رفتہ رفتہ لاوے کی سطح پر جھاگ نما تہہ چڑھنے لگی جو وقت گزرنے کے ساتھ ساتھ سخت ہوتی چلی گئی۔ لاوے اور ہوا کے درمیان ٹھوس تہہ کے چڑھنے کے بعد کرّۂ ہوائی میں موجود گیسی عناصر میں کیمیائی تعامُل ہوا، جس کے نتیجے میں پانی نے جنم لیا اور پوری زمین پر تاریخ کی طوِیل ترین مُوسلادھار بارش ہوئی۔ لاوے اور گیسی غلاف کے درمیان موجود ٹھوس تہہ جن جگہوں سے باریک (یعنی گہری) تھی پانی اُن سمتوں میں بہہ کر اِکٹھا ہوتا چلا گیا اور یوں سمندر پیدا ہوئے جبکہ اُس ٹھوس غلاف کی جو جگہیں موٹی (یعنی بلند) تھیں وہ بتدرِیج برِاَعظم اور سلسلہ ہائے کوہ قرار پائیں۔ اُسی ٹھوس غلاف پر بنی نوع اِنسان لاکھوں سالوں سے آباد ہے۔ مترجم

تشکیلِ ارض کے مراحلِ اَربعہ

1. (زمین اِبتداءً) مُتحرّک گرد و غبار، گیسوں اور کیمیائی مُرکبات کا بادل (تھی)
2. (دُوسرے مرحلے میں) نسبتاً وزنی ذرّات اُس بادل کے مرکز کی طرف سمٹ آئے۔
3. (تیسرے مرحلے میں) زمین کی اِبتدائی شکل و صورت (بنی) ، جس میں مرکز دھاتی (عناصر پر مشتمل) تھا اور اُس کے گِرد شہابیئے کی طرح کا مادّہ چڑھا ہوا تھا۔
4. (چوتھے مرحلے میں) بیرونی چٹانوں کے پگھلنے سے کرۂ حجری اور قشرِارض تشکیل پایا، زمین کی اندرونی تہہ سے کیمیکلز سطح کی طرف تیر آئے اور (اُنھوں نے) سمندروں اور اِبتدائی فضا کو تشکیل دیا۔