سورج اور نظام شمسی

سورج جوہماری زمین کے لئے روشنی اور حرارت کا بنیادی ذریعہ ہے، بہت معمولی درجے کا ایک ستارہ ہے۔ یہ کہکشاں کے مرکز سے 30 ہزار نوری سال کے فاصلے پر واقع ہے۔ سورج نظامِ شمسی کا مرکز ہے، جس میں 9 بڑے سیاروں، اور اُن کے چاندوں سمیت سیاروں کے مابین واقع چھوٹے اَجسام، ہزاروں سیارچے، دُمدار تارے اور شہابیئے شامل ہیں۔

سورج زیادہ تر ہائیڈروجن اور ہیلئم گیسوں پر مشتمل ہے۔ اُس کے مرکز میں ایک بڑا نیوکلیائی ری ایکٹر ہے، جس کا درجۂ حرارت کم از کم ایک کروڑ 40 لاکھ سینٹی گریڈ (2کروڑ 50لاکھ فارن ہائیٹ) ہے۔ سورج نیوکلیائی فیوژن کے ذریعے توانائی پیدا کرتا ہے، (نیوکلیائی فیوژن سے مُراد وہ عمل ہے) جس سے ہائیڈروجن ہیلئم میں تبدیل ہو جاتی ہے اور ساتھ ہی ساتھ توانائی کا اِخراج بھی کرتی ہے۔

سورج 40 لاکھ ٹن فی سیکنڈ کی شرح سے توانائی کی صورت میں اپنی کمیّت کا اِخراج کر رہا ہے۔ تاہم اُس کی کل کمیّت 210 ٹن ہے، جو زمین کی کمیّت کا 3,30,000 گنا اور نظامِ شمسی کے تمام سیاروں کی کمیّت کا 745 گنا ہے۔ سورج کا قطر 13,92,000 کلومیٹر (8,63,000 میل) ہے، جو زمین کے قطر سے 109 گنا (بڑا) ہے۔ سورج کا حجم زمین سے 13 لاکھ گنا زیادہ ہے۔

سورج کی سطح اور فضا

دُوربین کی مدد سے حاصل شدہ سورج کے عکس پراکثر اَوقات سیاہ دھبے دِکھائی دیتے ہیں، جنہیں ’سورج کے دھبے‘ (Sunspots) کہا جاتا ہے۔ اگرچہ وہ سیاہ نظر آتے ہیں مگر درحقیقت وہ خاصے روشن ہوتے ہیں۔ اُن کے تارِیک نظر آنے کا سبب (دراصل اُن کے) آس پاس واقع شدید روشن علاقہ ہوتا ہے جس کی نسبت وہ سیاہ دِکھائی دیتے ہیں۔ سورج کے اِن دھبوں کا درجۂ حرارت باقی سطحِ شمس سے 2,000 سینٹی گریڈ (3,600 فارن ہائیٹ) تک کم ہوتا ہے۔ سورج کے اِن قابلِ دِید دھبوں کی تِعداد ہر 11سالہ دَور میں کم و بیش ہوتی رہتی ہے۔ اس 11سالہ دَوری مدّت کے عروج پر دھبوں کے بہت سے گروپ بآسانی دیکھے جا سکتے ہیں، جبکہ اُس کی شدّت میں کمی کے دَوران بعض دفعہ کئی کئی دِنوں تک کوئی دھبّہ نظر نہیں آتا۔٭

٭ سورج کی مِقناطیسی فیلڈ کے اَثرات کی بدولت اُس کے کرۂ ضیائی (Photosphere) پر دَھبوں کے بہت سے گروپ دیکھے جا سکتے ہیں۔ اُن میں سے کچھ چند گھنٹوں میں غائب ہو جاتے ہیں جبکہ بعض کئی کئی ماہ تک برقرار رہتے ہیں۔ ہر 11سالہ عروج کے موقع پر بعض اَوقات وہ ننگی آنکھ سے بھی ہفتوں دِکھائی دیتے رہتے ہیں۔ اُن کا آخری عروج 1990ء میں ہوا تھا۔ راقم نے خود بغیر دُوربین ہفتہ بھر تک بآسانی اُن کا مشاہدہ کیا۔ آئندہ ان دھبوں کے ننگی آنکھ سے نظر آنے کا اِمکان اِکیسویں صدی کی اِبتداء میں ہونے والے اُن کے عروج کے موقع پر ہو گا۔ سورج کی محورِی گردِش اور اُس کی مدّت کا پتہ اِنہی دھبوں کی بدولت چلایا گیا۔ یہ دھبے سورج کی ٹکیہ پر مغربی کنارے سے مشرقی جہت میں چلتے رہتے ہیں۔ سورج کے خطِ اِستوا پر اُن کی رفتار 24 دِن 6 گھنٹے فی چکر جبکہ قطبین کے نزدِیک 35 دِن فی چکر کے حساب سے ہوتی ہے۔ مترجم

سورج کی چمکدار سطح کو کرۂ ضیائی (Photosphere) کہا جاتا ہے۔ کرۂ ضیائی کے گہرے مُشاہدے سے یہ ظاہر ہوتا ہے کہ وہ سینکڑوں کلومیٹر قطر کے حامل لاکھوں ذرّات پر مُشتمل ہے۔ سورج کی سطح ہر لحظہ اپنی ماہیّت کو تبدیل کرتی رہتی ہے کیونکہ ہر ذرّہ اپنے آپ کو تقریباً 10 منٹ تک ہی قائم رکھ پاتا ہے۔ کرۂ ضیائی سے گیس کے دو فوّارے باہر کی طرف لپکتے رہتے ہیں، جنہیں ’Spicules‘ کہا جاتا ہے۔ یہ عموماً 15,000 کلومیٹر (9,000 میل) قطر پر مشتمل ہوتے ہیں، مگر محض چند منٹ ہی برقرار رہتے ہیں۔

سورج کا وہ حصہ جو کرۂ ضیائی (Photosphere) کے اُوپر واقع ہے، لونی کرّہ (Chromosphere) کہلاتا ہے۔ کرۂ ضیائی کے اِنتہائی قریب واقع ہونے کی وجہ سے عام طور پر اُسے ننگی آنکھ سے دیکھنا ناممکن ہے۔ تاہم مکمل سورج گرھن کے دوران جب کرۂ ضیائی (Photosphere) مکمل طور پر چاند (کی ٹکیہ) کی اوٹ میں چھپ جاتا ہے تو لونی کرّے کا مُشاہدہ بآسانی کیا جا سکتا ہے۔٭

٭ اگرچہ مکمل سورج گرھن کے دوران لونی کرّے کا نظارہ بآسانی ممکن ہے تاہم ننگی آنکھ سے اُس کے مُشاہدے سے مُضِر اَثرات کا خدشہ بھی پایا جاتا ہے۔ گرھن کے دوران سورج کے مُشاہدے کے لئے ’ایکس ریز رپورٹ‘ یا کمپیوٹر کی فلاپی ڈسک کے اندرونی پتّے وغیرہ کا اِستعمال اِنسانی آنکھ کے لئے محفوظ ثابت ہوتا ہے۔۔۔ ۔مترجم

لونی کرّہ بعض اَوقات دہکتی ہوئی ہائیڈروجن کی بڑی بڑی لپٹیں باہر کو پھینکتا ہے، جنہیں ’Prominence‘ کہا جاتا ہے۔ وہ سورج کی بیرونی فضا میں سرایت (کرکے ختم) ہو جاتی ہیں۔ اُن کی اَوسط لمبائی 1,00,000 کلومیٹر (60,000 میل) ہوتی ہے۔ وہ متحرّک اور جامد دو اَقسام پر مُشتمل ہیں۔ متحرّک لپٹیں تُندوتیز ہوتی ہیں اور (اِسی لئے) بہت تھوڑا عرصہ زِندہ رہتی ہیں، جبکہ جامد لپٹیں بالکل پُرسکون اَنداز میں ہفتوں برقرار رہتی ہیں۔

فضائے شمسی کی سب سے بیرونی تہہ نور کا ہالہ (Corona) ہے جو شدید گرم مُہین ہائیڈروجن گیس پر مُشتمل ہے۔ شمسی شعلے (Solar Flares) سورج کی فضا میں ایک الگ قسم کا روشن ہیجان ہیں۔ اُن کا تعلق عموماً سورج کے دھبوں کے مختلف گروہوں کے ساتھ ہوتا ہے اور یہ چند منٹ کے اندر اندر بے اِنتہا چمکدار ہو جاتے ہیں۔ یہ بنیادی طور پر مِقناطیسی مظہر ہوتے ہیں اور چارج شدہ ذرّات اور شعاع ریزی (Radiation) کی بڑی مِقدار خارج کرتے ہیں۔

نظامِ شمسی

نظامِ شمسی سورج سمیت بہت سے ایسے اَجسام پر مُشتمل ہے جو اُس کی کششِ ثقل کی وجہ سے اُس کے ساتھ (ایک مربوط نظام کی صورت میں) بندھے ہوئے ہیں، جس میں سیارے، اُن کے چاند، سیارچے، دُمدار تارے، شہابیئے اور سیاروں کے مابین واقع گیس اور گرد و غبار شامل ہیں۔

(نظامِ شمسی کے) سیاروں کی کل تِعداد 9 ہے اور وہ سب کے سب سورج کے گِرد بیضوی مدار میں محوِ گردِش ہیں۔ سورج کی طرف سے فاصلے کی بنیاد پر اُن کی ترتیب کچھ یوں ہے:

i۔ عطارُد۔ ii زُہرہ۔ iii زمین

iv۔ مِرّیخ۔ v مُشتری۔ vi زُحل

vii۔ یورِینس۔ viii نیپچون۔ ix پلوٹو٭

٭ نظامِ شمسی کے سیاروں کی ترتیب یاد کرنے کے لئے انگریزی میں یہ جملہ معروف ہے:

My Very Educated Mother Just Sent Us Nine Pizzas.

اُردو میں ترتیب کے لئے: ’’عابد زاہد زیارت میں مصروف، زبیر یہاں نمائش پر‘‘۔

اِن میں سے (آخری سیارے) پلوٹو کا مدار سب سے زیادہ مُنحرفُ المرکز (بیضوی) ہے۔ اگرچہ سورج سے اُس کا اَوسط فاصلہ نیپچون کی نسبت زیادہ ہے تاہم اُس کے مدار کا کچھ حصہ نیپچون کی نسبت سورج سے زیادہ قریب ہو جاتا ہے۔ یہی وجہ ہے کہ 1979ء سے 1999ء تک نیپچون ہی نظامِ شمسی کا بعید ترین سیارہ رہا ہے۔

1992ء میں پلوٹو سے آگے پائے جانے والے ایک جِرمِ فلکی کا شہرہ ہوا۔ 200 کلومیٹر (120 میل) قطر کے حامل اُس جسم کے بارے میں خیال کیا جاتا ہے کہ وہ کوئی سیارچہ یا دُمدار تارہ ہو گا۔ اُس کا نام ’1992 کیو بی 1‘ رکھا گیا۔ اُس کا سورج سے فاصلہ تقریباً 8 ارب 80 کروڑ کلومیٹر (5 ارب 40 کروڑ میل) کے لگ بھگ ہے۔٭

٭ نظامِ شمسی میں ’پلوٹو‘ کے بعد کسی دُوسرے سیارے کی موجودگی کا اِمکان اُسی طرح باقی ہے جیسے 1930ء سے قبل ’یورینس‘ اور ’نیپچون‘ کے مدار پر کسی بیرونی سیارے کا اثرانداز ہونا سائنسدانوں کو ’پلوٹو‘ کی موجودگی کی طرف متوجہ کرتا رہا تھا۔ اَب حالت یہ ہے کہ اِنتہائی مختصر جسامت کے حامل پلوٹو کی دریافت کے باوُجود مداروں پر اثرانداز ہونے والے کسی دسویں سیارے کی تلاش جاری ہے اِنسان پلوٹو سے بھی دُگنے فاصلے تک کا علاقہ چھان چکا ہے مگر ہنوز اُس کی تلاش کارِ لاحاصل ہے۔بہرحال سورج کا دائرۂ کشش پلوٹو کے مدار سے ایک ہزار گنا فاصلے تک محیط ہے لہٰذا ابھی اِس بات کا اِمکان موجود ہے کہ کوئی سیارہ زیادہ دُوری پر موجود ہو، تاہم وہ زیادہ بڑا نہیں ہو گا۔متوقع دسویں سیارے کو ’Planet۔X‘ کا نام دیا گیا ہے۔ ’X‘ سے 10 بھی مراد لیا جاتا ہے اور ’’لا‘‘ (یعنی نامعلوم) بھی۔ جدید تحقیقات کی رُو سے یہ خیال بھی کیا جاتا ہے کہ ’یورینس‘ اور ’نیپچون‘ کے مداروں میں اِنحراف شاید اُن کے مُشاہدے میں ہونے والی خطاؤں کے پیشِ نظر ہے اور زیادہ قوِی اِمکان یہ ہے کہ اُن کے مداروں پر نظامِ شمسی سے باہر واقع ’’غیررسمی مادّہ‘‘۔۔ ۔ جو تشکیلِ کائنات کے دوران بچ گیا تھا۔۔ ۔ اثر اَنداز ہو رہا ہے۔

نظامِ شمسی کی پیدائش

نظامِ شمسی کے بارے میں عام طور پر یہ خیال کیا جاتا ہے کہ وہ 14 ارب 60 کروڑ سال پہلے ایک شمسی سحابیئے کے مرکز مائل اِرتکاز سے مادّے میں ہونے والے اِضافے کے نتیجے میں وُجود میں آیا۔ وہ شمسی سحابیہ اِبتدائً گیس اور گرد و غبار کا گھومتا ہوا بادل تھا جس سے بعد اَزاں سورج کی تخلیق عمل میں آئی۔

نظامِ شمسی کی اِبتدائی تشکیل کے وقت کششِ ثقل (ہی) ایک غالب قوّت کے طور پر موجود تھی۔ بعد اَزاں کسی مرحلے میں شمسی سحابیئے میں بہت سے مرکزے نمو پانے لگے جو بڑھتے بڑھتے آخرکار سیاروں کی شکل اِختیار کرتے چلے گئے، جنہیں آج ہم بخوبی جانتے ہیں۔ یہ حقیقت کہ تمام سیارے سورج کے گِرد یکساں سمت میں گردِش کرتے ہیں، یہ سوچنے پر مجبور کرتی ہے کہ یہ (نظامِ شمسی) یقیناً حقیقی شمسی سحابیئے کی محورِی گردِش ہی سے پیدا ہوا ہے٭۔

٭ کائنات کی اوّلین تشکیل کے وقت ’بِگ بینگ‘ کے بعد مادّہ ہر سُو بکھر گیا تھا۔ وہ مادّے کی دُخانی حالت تھی۔ وقت گزرنے کے ساتھ ساتھ اُس مادّے کا درجۂ حرارت کم ہوتا چلا گیااور اربوں نوری سال کی مسافت میں بکھرنے والا وہ مادّہ کروڑوں اربوں مرکزوں پر مجتمع ہونے لگا۔ یہاں تک کہ ہر بڑے مرکز کے اندر بے شمار چھوٹے مراکز اور اُن چھوٹے مراکز کے قرب و جوار میں اُن سے بھی چھوٹے مرکزے نمو پانے لگے۔ بڑے مراکز کہکشائیں قرار پائیں اور اُن کے اندر واقع چھوٹے مراکز کا مادّہ سکڑ کر آہستہ آہستہ ستاروں کی شکل اِختیار کرتا چلا گیا۔ یونہی اُن کے آس پاس موجود مادّے کے معمولی حصے اُن ’نیم ستاروں‘ کے گِرد گھومتے ہوئے سکڑنے لگے اور آہستہ آہستہ اکثر و بیشتر ستاروں کے گِرد اُن کے اپنے ’نظام ہائے شمسی‘ وُجود میں آ گئے۔ ہمارا سورج بھی ایسا ہی ایک ستارہ ہے۔ کائنات میں اِس جیسے بے شمار ستارے موجود ہیں جن کے گِرد اُن کے اپنے سیاروں کے نظام ہیں۔ عین ممکن ہے کہ اُن میں سے بیشتر میں زِندگی بھی پائی جاتی ہو مگر اُن کی ہم سے بے پناہ دُوری کی وجہ سے ابھی کچھ کہنا قبل اَز وقت ہو گ۔ مترجم

سیارچے

سیارچے جنھیں بعض اَوقات نجمیئے (Asteroids) بھی کہہ دِیاجاتا ہے، ہزاروں کی تِعداد میں پائے جاتے ہیں۔اُن میں سے بیشتر مریخ اور مُشتری کے درمیان ایک پٹی کی صورت میں سورج کے گِرد گردِش کرتے ہیں۔ سب سے بڑا سیارچہ ’سیرس‘ (Ceres) ہے، جس کا قطر تقریباً 941 کلومیٹر (585میل) ہے۔ پہلے پہل یہ گمان کیا جاتا تھا کہ یہ سیارچے کسی ایسے سیارے کے باقی ماندہ (ٹکڑے) ہیں جو مُشتری کی کشش کے باعث تباہ ہو گیا تھا۔ اَب اکثر ماہرینِ فلکیات کا یہ خیال ہے کہ یہ سیارچے اَیسے بنیادی اَجزاء ہیں جو نظامِ شمسی کی اَوّلین تخلیق کے موقع پر ہی مُشتری کی بے پناہ کششِ ثقل کی وجہ سے (سیارہ بننے سے) رہ گئے تھے۔٭

٭ مُشتری کی قوتِ کشش زمین کی نسبت 2.69 گنا زیادہ ہے۔ مترجم

شہابیئے اور شہابِ ثاقب

سیاروں کے علاوہ چھوٹے چھوٹے لاکھوں ذرّات بھی سورج کے گِرد محوِگردِش ہیں، جنہیں شہابیئے(Meteors) کہا جاتا ہے۔ یہ جسامت میں ریت کے ذرّات جتنے ہوتے ہیں۔ یہی وجہ ہے کہ خلا میں اُن کا مُشاہدہ ممکن نہیں ہوتا۔ جب کوئی شہابیہ زمین کی فضا میں داخل ہوتا ہے تو وہ رگڑ کھا کر گرم ہوجاتا ہے اور بالآخر تباہ ہو جاتا ہے۔ ایسے میں ہوا میں روشنی (کی لکیر) پیدا ہوتی ہے جس کے سبب ہم شہابِ ثاقب یا ٹوٹتے ہوئے ستارے کا مشاہدہ کرتے ہیں۔ تقریباً 4کروڑ شہابِ ثاقب روزانہ زمین کی فضا میں داخل ہوتے ہیں۔٭

٭ نظامِ شمسی میں موجود یہ ننھے شہابیئے زمین کے قرب و جوار میں بھی پائے جاتے ہیں۔ جب خلانورد چہل قدمی کے لئے خلائی شٹل سے باہر نکلتے ہیں تو اُنہیں اُن گولی سے تیزرفتار گردوغبارکے ذرّات اور کنکریوں سے سابقہ پڑتا ہے۔ بعض دفعہ تو اُن ذرّات کی رفتار 40 کلومیٹر فی سیکنڈ سے بھی زیادہ ہوتی ہے۔ اِس آفت سے بچاؤ کے لئے خلانوردوں کے خلائی لباس میں خصوصی اِنتظامات کئے جاتے ہیں تاہم ایک خاص حد سے بڑے شہابیؤ ں کی ٹکر سے بچنا پھر بھی قریب قریب ناممکن ہوتا ہے۔ مترجم

بڑے شہابِ ثاقب کے لئے (کسی حد تک) ممکن ہے کہ وہ اپنے آپ کو (مکمل طور پر تباہ ہونے سے) بچائے رکھے اور زمین تک صحیح سلامت آن پہنچے۔ انہیں حجرِ شہابی (Meteorites) کہا جاتا ہے۔ بعض دفعہ جب کوئی (بڑا) شہابیہ زمین پر گِرتا ہے تو وہ (اپنے گِرنے کی جگہ پر) ایک گڑھا بھی پیدا کر دیتا ہے۔ اِس کی بہترین مِثال امریکی ریاست ایریزونا (Arizona) کا گڑھا ہے، جس کا قطر 1,265 میٹر (4,150 فٹ) ہے۔٭

٭ 1.265 کلومیٹر قطر کا یہ گڑھا امریکی ریاست ’ایریزونا‘ میں واقع ’فلیگ سٹاف‘ نامی علاقے کے قریب موجود ہے۔ یہ کرۂ ارض پر واقع سب سے بڑا گڑھا ہے جو 180 میٹر گہرا ہے۔ خیال کیا جاتا ہے کہ آج سے تقریباً 50 ہزار سال قبل لوہے اور نِکّل کی ساخت پر مبنی 40 میٹر قطر اور 25لاکھ ٹن وزن کا حامل ایک ’حجرِشہابی‘ سطحِ ارض سے ٹکرایا تھا جس کی وجہ سے یہ عظیم گڑھاپیدا ہوا۔ مذکورہ ’حجرِشہابی‘ کے اَجزاء کے اَثرات گڑھے کے گِردا گِرد آج بھی موجود ہیں، جبکہ خیال کیا جاتا ہے کہ دھماکے کے وقت اُس کا اکثر مادّہ بخارات بن کر تحلیل ہو گیا تھا۔ اُس گڑھے کو سب سے پہلے 1891ء میں دریافت کیا گی۔ مترجم

دُمدار تارے

دُمدار تاروں کے بارے میں یہ گمان کیا جاتا ہے کہ وہ برف اور گرد کے چھوٹے مرکزے پر مشتمل ہوتے ہیں۔ اُنہیں ’برف کے گرد آلود گولے‘ (Dirty Snowballs) بھی کہا جاتا ہے۔ جب کوئی دُمدار تارہ سورج کے قریب پہنچتا ہے تو اُس کا مرکزہ بخارات پر مشتمل روشن بادل (Coma) اور دُم تشکیل دیتا ہے، جو ہمیشہ سورج کی مخالف سمت میں رہتی ہے۔ مرکزہ اگرچہ چند کلومیٹر قطر پر مشتمل ہوتا ہے مگر اُس کے گِرد روشن بادل کا غلاف (Coma)۔ 10لاکھ کلومیٹر سے بھی زیادہ قطر پر محیط ہو سکتا ہے۔

(نظامِ شمسی سے منسلک) دُمدار تاروں کے بارے میں یہ خیال کیا جاتا ہے کہ وہ اُورٹ بادل (Oort Cloud) نامی جگہ پر تشکیل پاتے ہیں، جو سورج سے تقریباً ایک نوری سال کی مسافت پر واقع ہے٭۔ کبھی کبھار اُورٹ بادل سے بے قرار ہو کر نکلنے والے دُمدار تارے سورج کی طرف آ نکلتے ہیں۔ یہ بھی ممکن ہے کہ کسی سیارے کی کششِ ثقل دُمدار تارے کو کھینچ کر اپنے قریب مگر بہت زیادہ بیضوی مدار میں کر لے جو مقررّہ میعاد کے لئے سورج کے قریب بھی جا سکتا ہے۔

٭ اُورٹ بادل کا نام اُسے دریافت کرنے والے ڈچ ماہرِ فلکیاتJan Hendrik Oort (1900۔92) کے نام پر رکھا گیا۔ یہ بادل جمی ہوئی گیس اور گرد و غبار سے بنا ہے اور سورج سے 1.5 نوری سال کی مسافت پر واقع سورج ہی کے گِرد محوِ گردش ہے۔ اسے 1950ء میں دریافت کیا گیا۔ مترجم

مُتعارف دُمدار تاروں کی سب سے اچھی مثال ہیلے کا دُمدار تارہ (Halley's Comet) ہے، جس کی (سورج کے گِرد ایک) گردِش کا دَورانیہ 76 سال پر محیط ہوتا ہے۔ ہیلے کے دُمدار تارے کا نام برطانوی ماہرِ فلکیات ایڈمنڈ ہیلے (Edmund Halley) کے اِعزاز میں رکھا گیا، جس نے 1758ء میں اُس دُمدار تارے کی سورج کی طرف واپسی کی کامیاب پیشینگوئی کی تھی۔٭

٭ ایڈمنڈہیلے کے نام سے منسوب دُمدار تارہ جو اپنے بہت زیادہ بیضوی مدار کے باعث ہر سال 76 سال بعد منظرِ عام پر آتا ہے اور اُس کے بعد خلاء کی وُسعتوں میں کھو جاتا ہے۔ ہیلے نے اُسے 1682ء میں دیکھا اور پیشینگوئی کی کہ یہ 76سال بعد 1758ء میں دوبارہ ظاہر ہو گا۔ چنانچہ اُس کی تحقیق سے یہ بات طے ہوئی کہ دُمدار تارے مخصوص مدت کے بعد سورج کے گِرد واقع اپنے مدار میں لوٹ کر آتے ہیں۔ آخری دفعہ یہ 6فروری1986ء کو سورج کے قریب آیا۔اُس دوران بہت سے خلائی جہاز (Probes) اُس کے تعاقب میں بھیجے گئے جنہوں نے اِنتہائی قریب جا کر اُس کا مُشاہدہ کیا اور تصاویر اَہلِ زمین کو اِرسال کیں۔ اُس کے آلو جیسے مرکز کی لمبائی 15 کلومیٹر جبکہ چوڑائی 8کلومیٹر ہے اور وہ زیادہ تر برف پر مشتمل ہے۔ اس دُمدار تارے کا مشاہدہ 240قبل مسیح سے ہر 74 سے 79 سال کے وقفوں کے بعد کیا جاتا رہا ہے جس کا باقاعدہ ریکارڈ چین اور جاپان کی قدیم تاریخی کتب میں محفوظ ہے۔ آ ئندہ اُسے 2061ء میں دیکھا جا سکے گا۔ مترجم

یہ بھی ممکن ہے کہ دیگر دُمدار تارے مکافی مدار(Parabolic Orbit) کے حامل ہوں، جو سورج کی طرف محض ایک آدھ دفعہ ہی آتے ہوں اور پھر ہمیشہ کے لئے نظامِ شمسی سے دُور کھو جاتے ہوں۔ دُمدار تارے (اپنے راستے سے بھٹک کر حادثاتی طور پر) زمین سے ٹکرا بھی سکتے ہیں۔ ایسا ہی ایک واقعہ جون 1908ء میں رُونما ہوا تھا، جب سائبیریا کے کم آباد علاقے ٹنگسکا (Tunguska) میں ایک عظیم دھماکہ ہوا، جس کے نتیجے میںایک وسیع و عریض رقبے کے درخت جڑوں سے اُکھڑ گئے۔ ممکن ہے کہ اِس قدر غیرمعمولی تباہی کا باعث عام طور پر (زمین سے) ٹکرا کر گڑھا پیدا کرنے والے شہابیئے کی بجائے کسی چھوٹے دُمدار تارے کا مرکزہ ہو۔٭

٭ رُوس کے بے آباد سرد شمالی علاقے ’سائبیریا‘ میں واقع ’سٹونی ٹنگسکا‘ نامی دریا کے شمال میں 30 جون 1908ء بروز منگل ایک عظیم دھماکہ ہوا جس کی آواز 800 کلومیٹر دُور تک بآسانی سنائی دِی اور پوری دُنیا کی سکیلز پر اُسے ریکارڈ کیا گیا۔ یہ دھماکہ سورج کی سی چمک رکھنے والے دُمدار تارے کی زمین سے ہونے والی ٹکر کے نتیجے میں پیدا ہوا تھا۔دھماکے کے مقام سے 40 کلومیٹر دُور تک کے تمام درخت اُکھڑ کر دُور جا گِرے اور 1,000 مربع کلومیٹر رقبے پر موجود درخت اور ہر طرح کے جاندار زِندگی سے ہاتھ دھو بیٹھے۔ اس دھماکے سے کثیر مِقدار میں گرد و غبار اُڑا جس سے رُوس اور یورپ کے بہت سے ممالک میں ہفتوں طلوعِ آفتاب کا منظر بڑا دِلنشیں نظّارہ پیش کرتا رہا۔ ایسا ہی ایک واقعہ حال ہی میں 19 جنوری 2000ء بروز بدھ پیش آیا جب سپین میں برف کے عجیب و غریب گولے گِرنے سے بعض گھروں کی چھتوں میں سوراخ ہو گئے۔ اُن گولوں کا قطر 8 اِنچ اور وزن 4 کلو گوام کے لگ بھگ تھا۔ خیال کیا جاتا ہے کہ برف کے وہ گولے کسی دُمدار تارے کے ٹکڑے تھے جو بھٹک کر زمین کی طرف آ نکلے۔ زمین کی فضائی حدُود میں داخلے کے وقت اُن کی جسامت خاصی بڑی ہو گی تاہم سطحِ ارض سے ٹکرانے سے قبل ہوا کی رگڑ سے جھلس کر اُن کی جسامت اور وزن میں اِس قدر کمی واقع ہو گئی کہ وہ کوئی خاص قابلِ ذِکر تباہی نہ مچا سکے۔ (بحوالہ خبرنامہ پی ٹی وِی 19جنوری2000ء)۔ مترجم

وقت کا نظام

زمین کی محورِی گردش اُس کے مدار کے تناسب سے خمدار ہے، جس کی وجہ سے سورج باقی ستاروں کی نسبت یکساں رفتار سے سفر کرتا دِکھائی نہیں دیتا۔ (یہی وجہ ہے کہ معمولاتِ زِندگی میں کسی قدر سہولت کی غرض سے) وقت کی پیمائش کے اکثر نظاموں کی بنیاد ایک ’فرضی سورج‘ پر رکھی گئی ہے، جو ’حقیقی سورج‘ کی اَوسط رفتار کے برابر مستقل رفتار کے ساتھ سفر کرتا ہے٭۔ (دُنیا کے تمام ممالک اپنے معیاری وقت کا تعین فرضی سورج ہی کے حساب سے کرتے ہیں۔)

٭ زمین کا محور کے اُس کے مدار کی نسبت 23.4415^o ڈِگری جھکاؤ رکھتا ہے، جس کی وجہ سے سورج کے روزانہ طلوع و غروب میں ایک آدھ منٹ کا فرق عام طور پر مُشاہدے میں آتا ہے۔ اِسی طرح سردیوں میں دِن چھوٹے اور گرمیوں میں بڑے ہوتے ہیں۔ جو خطے خطِ اِستواء سے جس قدر دُور ہیں وہ اُسی قدر سورج کی اِن حرکات سے زیادہ متاثر بھی ہیں۔ چونکہ زمین ایک کرّہ ہے اور سورج سارا سال خطِ اِستواء کی طرح پوری زمین پر یکساں اَوقات میں طلوع و غروب نہیں ہو سکتا اِس لئے ضروری خیال کیا گیا کہ سورج کی خطِ اِستواء پر پائی جانے والی حرکات کے مماثل اُس کی اَوسط حرکات پر مبنی نظام وضع کیا جائے اور اُس ’فرضی سورج‘ کے لحاظ سے پوری دُنیا کے معیاری اَوقات کا تعیّن کرتے ہوئے وقت کے نظاموں کی بنیاد رکھی جائے۔ چنانچہ ’حقیقی سورج‘ کی اَوسط رفتار کے مماثل مستقل رفتار سے محوِ سفر ایک ’فرضی سورج‘ کو قیاس کیا گیا جو دُنیا بھر میں خطِ اِستواء کی طرح صبح 6 بجے طلوع اور شام 6 بجے غروب ہوتا ہے۔ دوپہر ٹھیک 12 بجے اور نصف شب ٹھیک 12 بجے عمل میں آتی ہے۔ حقیقی اور فرضی سورج کے اَوقات میں تفاوُت سرما کی شدّت میں خط اِستواء سے زیادہ دُور ملکوں میں منٹوں کی بجائے گھنٹوں تک جا پہنچتا ہے جس کے اِزالے کے لئے 40 درجہ عرض بلد سے دُور واقع تقریباً تمام ممالک ’حقیقی سورج‘ کے طلوع کے ساتھ کسی قدر یکسانی پیدا کرنے کے لئے سال بھر میں ایک بار اپنا معیاری وقت آگے اور پیچھے کرتے رہتے ہیں۔ مترجم

دِن وقت کی وہ اِکائی ہے جو زمین اپنے محور کے گِرد ایک چکر لگانے میں صرف کرتی ہے۔ ’فلکی دِن‘ (Sidereal Day) کو ستاروں کی پوزیشن کے حوالے سے شمار کیا جاتا ہے ٭۔ یہ وہ دَورانیہ ہے جو کوئی ستارہ کسی مُشاہدہ کرنے والے کو ایک ہی طول بلد(Meridian) پر اگلے روز دوبارہ نظر آنے میں صرف کرتا ہے ٭٭۔ ایک ’فلکی دِن‘ کی مدّت ایک ’حقیقی سورج‘ کے ’فرضی سورج‘ کے ساتھ تناسب کے لحاظ سے 23گھنٹے، 56منٹ اور 04سیکنڈ ہوتی ہے جبکہ ’فرضی شمسی دِن‘ 24گھنٹے کا ہوتا ہے۔

٭ ’فلکی دِن‘ دَرحقیقت زمین کی 360 ڈِگری محورِی گردِش کو کہا جاتا ہے ، جو وہ 23گھنٹے، 56منٹ اور 04 سیکنڈ میں طے کرتی ہے۔ جبکہ ’شمسی دِن‘ 24گھنٹے پر محیط ہوتا ہے، جو زمین کی تقریباً 361درجے محورِی گردِش سے پیدا ہوتا ہے۔ اِس ایک درجے کا اِضافہ اِس لئے ہوتا ہے کہ زمین اپنی محورِی گردِش کے ساتھ ساتھ سورج کے گرد بھی گردِش کر رہی ہے اور اپنی ایک محورِی گردِش 360^o پوری کرنے تک وہ سورج کے گِرد اپنا ایک درجے کا سفر طے کرتے ہوئے اپنے پچھلے دِن کے مقام سے تقریباً ایک درجہ آگے بڑھ چکی ہوتی ہے۔ اِس اِضافے کو پورا کرنے کے لئے اُسے مزید 3منٹ اور 56سیکنڈ درکار ہوتے ہیں۔ 360 درجے کی محورِی گردِش یا دُوسرے لفظوں میں 23گھنٹے، 56منٹ اور 04 سیکنڈ میں طے ہونے والا دِن ’فلکی دِن‘ اور 361درجے کی محورِی گردِش یا دُوسرے لفظوں میں 24گھنٹے میں طے ہونے والا دِن ’فرضی دن‘ کہلاتا ہے۔ اِسی کو معروف معنوں میں ’حقیقی دِن‘ تصوّر کیا جاتا ہے۔ مترجم

٭٭ ’Meridian‘ ایک ایسا ’طول بلد‘ یا فرضی نصف دائرہ ہے جو زمین کے ’شمالی قطب‘ کو ’جنوبی قطب‘ سے کسی ناظر کی ’سمتُ الراس‘ (Zenith) سے گزرتے ہوئے ملاتا ہے اور آفاق کو ناظر کی شمالاً جنوباً سمتوں سے کاٹ کر کرّۂ سماوِی کو مشرقی اور مغربی دو نصف کرّوں میں تقسیم کرتا ہے۔ مترجم

سال وقت کی وہ اکائی ہے جو زمین سورج کے گِرد اپنے مدار میں ایک چکر پورا کرنے میں صرف کرتی ہے۔ زمین اپنے مدار میں ایک حقیقی چکر 365دِن، 6گھنٹے، 9منٹ اور 10سیکنڈمیں پورا کرتی ہے۔ اسے ’فلکی سال‘ (Sidereal Year) بھی کہا جاتا ہے۔ جبکہ وہ سمت جس میں زمین کا محورِی نقطہ اُس اثر کی وجہ سے تبدیل ہوتا رہتا ہے، اُسے ’اِستقبالِ اِعتدالین‘ (Precession) کہتے ہیں۔ ’فصلی سال‘ (Tropical Year) اِستقبالِ اِعتدالین کے اَثرات کا اِزالہ کرتا ہے اور وہ 365دِن، 5گھنٹے، 48منٹ اور 45سیکنڈ کا ہوتا ہے٭۔ تقویم (کیلنڈر) بنانے کے لئے بھی ’فصلی سال‘ ہی کو (ایک بنیاد کے طور پر) اِستعمال کیا جاتا ہے۔

٭ فصلی سال کی مدت 365.24219878 دِن (بمطابق گینز بک آف ریکارڈز)۔ مترجم