انسانی فطرت دو چیزوں سے مرکب ہے ’ارادۂ خیر اور ارادہ شر‘ ان دونوں قوتوں میں تصادم جاری رہتا ہے۔ اگر ارادہ شر کی قوتیں غالب آ جائیں تو انسان اسفل السافلین کی منزل تک جا پہنچتا ہے اور اگر ارادۂ خیر کی قوتیں غالب و فائق ہو جائیں تو وہ انسان، انسان مرتضیٰ بن جاتا ہے۔ خوش قسمت ہیں وہ افراد جو ان دونوں خلقی و جبلی قوتوں کی کش مکش میں خیر و نیکی کی قوتوں کے نفس انسانی پر تغلب کیلئے کوشاں رہتے ہیں۔ محروم و خاسر ہیں وہ لوگ جو برائی و شر کی قوتوں کو پروان چڑھاتے ہیں۔ اس کشمکش میں اسلام نیکی و خیر کی قوتوں کے فروغ و ترویج کیلئے تحریک پیدا کرتا ہے، برائی و شر، گناہ و خطا، معصیت و نافرمانی سے مائل بتنفر کرتا ہے۔

یہی وجہ ہے کہ اسلام گناہگار و خطاکار سے نہیں گناہ و خطاء سے نفرت کا درس دیتا ہے، مظلوم سے نہیں ظلم سے تعلق خاطر منقطع کرنے کی تعلیم دیتا ہے، محکوم سے نہیں ظالم و مستبد حاکم سے دوبدو پنچہ آزمائی کیلئے ابھارتا ہے، مجبور مقہور سے نہیں، جابر و ستم شعار سے تذلیل و تحقیر آمیز سلوک کیلئے کرتا ہے، مجرم سے نہیں، جرم سے ناپسندیدگی کا اظہار کرتا ہے۔

یہ کتاب شیخ الاسلام ڈاکٹر محمد طاہرالقادری کے سنٹر جیل فیصل آباد میں قیدیوں سے کئے گئے خطاب پر مشتمل ہے۔ یہ کتاب روحانی و اخلاقی اور تربیتی لحاظ سے ہر خاص و عام کیلئے بالعموم اور جیل کی زندگی بسر کرنے والوں کیلئے بالخصوص ’’ایک نایاب نسخے‘‘ کی حیثیت رکھتی ہے۔ باری تعالیٰ ہمیں صدق دل اور کامل اخلاص کے ساتھ اس سے استفادہ کرنے اور اپنے تزکیہ نفس اور اصلاح احوال کی طرف متوجہ ہونے کی توفیق عطا فرمائے۔